Lapikoan / Artikuluak / Astronomia, astrofisika eta espazioa

Ilargia, gure satelite arraro hori

2010/04/16 Lucía Álvarez

 

Duela 4.500 milioi urte, Marteren tamainako gorputz batek Lurra jo zuen, eta askatu ziren pusketetatik sortu zen Ilargia. Ez zen nolanahiko talka izango! Ez da ohikoena sateliteak planeten pusketetatik sortzea. Egin kontu, gure eguzki-sisteman aurkitu dituzten 165 sateliteetatik, Ilargia da modu horretan garatutako satelite bakarra. Eta, zientzialarien kalkuluen arabera, unibertso osoko planeta-sistemen hamarretik batek baino gutxiagok du era horretan jaiotako sateliteren bat. Behintzat, hori kalkulatzen dute astronomoak.

Ez pentsa, hala ere, hain gutxitan gertatzen den banatze hori bat-bateko kontua denik. Hasieran, talkaren ondorioz askatutako zatiak hondakin moduan geratzen dira planetaren inguruan biraka. Pixkanaka, zati horiek batzen joaten dira, eta satelitea sortzen dute.

Dena den, gutxitan gertatzen da hori. Eta nola jakin dute zientzialariek fenomeno bitxia eta ezohikoa dela? Bada, batetik, lehen aipatu bezala, beste planetek ez dute gurearen moduko ilargirik izaten, eta, gainera, zientzialariek uste dute, horrelakoak ohikoak balira, planeten inguruetan hondakin-hodeiak ikusiko liratekeela. Baina ez dute horrelako asko detektatu. Horregatik uste dute talken ondorioz sortutako sateliteak bitxikeria bat direla unibertsoan.