Lapikoan / Esperimentuak / Biziaren zientziak

Mingainak zaporeentzat dituen txokoak

2010/05/07 Oihane Lakar

Jaten ditugun elikagaien zaporea ahoan hautematen dugu; mingainean, hain zuzen ere. Ez dut uste hori gauza berria denik inorentzat. Baina ohartu zara zapore gozoa eta gazia, adibidez, ez dituzula mingainaren alde berean hautematen? Egin dezagun esperimentu bat hori frogatzeko.

Behar duzun materiala
Kotoia
Limoi-zukua
Edalontzi bat ur
Azukrea
Gatza
Kafe hutsa

Egin beharrekoa
Bolatxo bat egin kotoi-puska batekin, busti limoi-zukutan eta igurtzi mingain osoan. Ondoan, mingainaren marrazki bat duzu. Marraztu irudi horretan zer aldetan hauteman duzun limoiaren zapore garratza.
Beste kotoi-puska bat hartu, uretan busti, eta azukretan sartu. Ondoren mingain osoan igurtzi, eta, aurrekoan bezala, adierazi mingainaren zein aldek hautematen duen zapore gozoa.
Behar dituzun kotoi-puska guztiak erabili gatzaren zapore gazia, kafearen zapore mingotsa eta bururatzen zaizkizun beste hainbat gauzaren zaporeak mingainaren zein aldetan hautematen dituzun ikusteko.

Zer gertatu da?
Mingainean, zaporea hautemateaz arduratzen diren milaka dastamen-papila daude, eta mingainaren eremu bakoitzekoek zapore-mota batekin bakarrik erreakzionatzen dute. Zergatik uste duzu, bestela, almendrak edo pipak jaten ari zarenean, irentsi arte ez duzula sumatzen mingotsa zegoena? Mingainaren atze-atzean dagoelako zapore hori hautematen duen eremua!