Lapikoan / Nola funtzionatzen du / Matematika

Matematika inurrientzat

2012/04/11 Arantxa Txintxurreta

Paperezko zintekin jolastuko gara, eta orduan ulertuko dugu nola den posible zintaren bi aldeetan marraztea arkatzik altxatu gabe!

 

Folio batetik, 5 zentimetro zabaleko tira bat moztu.

Erdi-erdian, goitik beherako marra bat marraztu, arkatzez.

Paperaren bi ertzak zinta itsaskorrez itsatsiz, zirkulu bat lortuko duzu. A ZINTA deituko diogu.

Non geratu zaizu marra, zirkuluaren kanpoaldean ala barruko aldean?

 

Orain, moztu 5 zentimetroko zabalera duen beste tira bat, eta marraztu marra, aurrekoan egin duzun bezala.

Paperaren bi ertzak zintza itsaskorrez itsatsi, baina, oraingoan, buelta erdia eman ertzetako bati. B ZINTA deituko diogu.

Non geratu zaizu marra, zirkuluaren kanpoaldean ala barruko aldean? A ZINTAN, marraren hasierak eta bukaerak bat egiten zuten. Buelta erdia emana duen honetan, zer gertatu da?

 

 

AZALPENA

A ZINTAN, marraztutako marran zehar inurri bat ibiliko balitz, ez litzateke sekula marrarik gabeko aldera iritsiko, eta birak emanez zorabiatu egingo litzateke, seguruenik.

B ZINTAN, ordea, marraztutako marrak etena du, ez dira elkartzen marraren hasiera eta bukaera. Elkar ditzagun, bada: hartu arkatza eta segi marra marrazten. Marra berria aurrekoaren bikoitza da! Eta, hara, marra kanpoko aldean zein barrukoan geratu zaigu!

 

Hortaz, marra horren gainean jarriko bagenu inurria, A ZINTAN egin duen ibilbidearen bikoitza egingo luke, inolako etenik gabe, hasierako puntu berera iristeko. Oraingoan, inurria, zorabiatu ez ezik, nekatu ere egingo zaigu!